Чым модуль данэйта можа быць карысны грамадскім арганізацыям. Частка 2. Юрыдычная

Матэрыял блога падрыхтаваны пры дапамозе юрысткі, дырэктаркі Цэнтра прававой трансфармацыі Вольгі Смалянкі і прадстаўнікоў плацёжнага сэрвіса bePaid.

Каманда “Лічбавай майстэрні” працягвае пілоціць модуль данейта “Дойка” – праграмнага опенсорснага рашэнне для прыёма грашовых ахвяраванняў на рахункі грамадскіх арганізацый праз банкаўскія карткі, альбо, кажучы іншымі словамі – метадам эквайрынгу.

Болей за тое – праект перамог у хакатоне EaP Civil Society Hackathon 2018 сярод праектаў Грамадзянскай супольнасці. У хуткім часе каманда атрымае грашовы прыз і, такім чынам, у “Дойкі” з’явяіцца яшчэ больш карысных магчымасцяў.

У мінулым матэрыяле блога я разглядала тэхнічную частку выкарыстання модуля – што з сябе ўяўляе праграма, у чым яе карысць для грамадскіх арганізацый, дзе шукаць модуль на опенсорсе, як усталяваць і як карыстацца.

Але ў прадстаўнікоў арганізацый узнікае і шмат юрыдычных пытанняў датычна выкарыстання модуля: які юрыдычны статус павінны быць у арганізацыі, якія патрабаванні да сайта, рахунка і інш.

Таму ў сённяшнім артыкуле – інфармацыя, заснаваная на каментарах юрыста, працоўных падатковай інспекцыі, а таксама прадстаўнікоў bePaid – кампаніі, якая займаецца абслугоўваннем інтэрнэт сістэм і платформ для прыёма і апрацоўкі анлайн-плацяжоў.

Пачну з неабходных юрыдычных ўмоваў. Каментар юрысткі Вольгі Смалянкі.

Статус арганізацыі: афіцыйны і некамерцыйны

Арганізацыя павінна мець афіцыйную дзяржаўную рэгістрацыю і некамерцыйны статус (арт. 553 Грамадзянскага кодэкса РБ: ахвяраванні могуць прымаць толькі некамерцыйныя арганізацыі ).

Дабраахвотныя ахвяраванні – дазволеная заканадаўствам крыніца атрымання сродкаў грамадскімі арганізацыямі, фондамі і іншымі некамерцыйнымі ўстановамі (Закон РБ аб грамадскіх аб’яднаннях), таму без рэгістрацыйнага пасведчання, статута і пячаткі не абыйсціся.

Заканадаўства Рэспублікі Беларусь не прадугледжвае справаздачы ад грамадскіх арганізацый у падатковую інспекцыю за грошы, атрыманыя ў якасці ахвяраванняў ад фізічных асобаў – рэзідэнтаў РБ.

Статутны момант: збор сродкаў ад фізічных асобаў можа ажыцяўляцца на любую мэту, якая не супярэчыць статутнай мэце некамерцыйнай арганізацыі.

Статус сайта: беларуская даменная зона і рэгістрацыя ў БЕЛДІЭ

Сайт грамадскай арганізацыі павінны быць абавязкова зарэгістраваны на юрыдычную асобу – арганізацыю ў БЕЛДІЭ – дзяржаўнай інспекцыі Рэспублікі Беларусь па электрасувязі Міністэрства сувязі і інфарматызацыі Рэспублікі Беларусь.

Галоўная ўмова рэгістрацыі: размяшчэнне сайта на хостынгу на тэрыторыі Беларусі.

Калі арганізацыя і яе сайт маюць патрэбныя статусы – можна пераходзіць да аперацый з банкаўскім рахункам.

Аперацыі з рахункам:

Для таго, каб ахвярадаўцы з дапамогай модуля маглі пералічваць грошы на рахунак грамадскіх арганізацый метадам эквайрынгу, банкаўскі рахунак неабходна зарэгістраваць у сістэме “РАЗЛІК” – аўтаматызаванай інфармацыйнай сістэме адзінай разліковай інфармацыйнай прасторы.

У падключэнні да сістэмы “РАЗЛІК” – заключэнні дамовы інтэрнэт-эквайрынгу – дапамагаюць кампаніі-агрэгатары (плацёжныя аператары), якія выступаюць пасярэднікам паміж юрыдычнай асобай і банкам і робяць магчымым прыём плацяжоў з картак на сайце.

На дадзены момант модуль “Дойка” падтрымлівае агрэгатара bePaid. У будучым плануецца пашырэнне лінейкі агрэгатараў.

Грашовы момант:

– 0,7% ад сумы прынятага плацяжа (ПДВ – падатак на дадатковую вартасць – ужо ўключаны) атрымлівае агрэгатар (у дадзеным выпадку – bePaid)
– штомесячны памер узнагароджання bePaid не можа быць меньш, чым 0,5 базавай велічыні
– 2,3 % складае камісія банка-эквайера (банка, якому належыць тэрмінал ці банкамат, у якім абслугоўваецца карта)

Далучэнне рахунка да сістэмы “Разлік” прадугледжвае наступныя моманты:

– 3% ад сумы кожнай транзакцыі здымае банк-эмітэнт (банк, які абслугоўвае рахунак)

– у межах заяўкі ў банк арганізацыя абавязана ўказаць мінімальную і максімальную сумы, у межах якіх лімітаў яна хоча працаваць

Прыклад табліцы лімітаў з заяўкі:

Як толькі рахунак арганізацыі далучаны да сістэмы “РАЗЛІК”- усё, можна карыстацца модулем данейта.

Дадатковыя ўдакладненні:

– усе грошы, якія пералічваюцца грамадзянамі-нерызедентамі РБ, падлягаюць абавязковай рэгістрацыі ў Дэпартаменце па гуманітарнай дзейнасці Кіравання справамі Прэзідэнта Рэспублікі Беларусь (Дэкрэт Прэзідэнта Рэспублікі Беларусь ад 31.08.2015 № 5 “Аб атрыманні і выкарыстанні іншаземнай дармовай дапамогі”). Калі арганізацыя не хоча абцяжарваць сябе такога кшталту абавязкамі – можна адразу паставіць блакіроўку на атрыманне грошаў з картаў, якія выдадзеныя банкамі-нерызедзентамі РБ;

– у кожнай арганізацыі, падключанай да інтэрнэт-эквайрынгу, ёсць магчымасць павярнуць сродкі ахвярадаўцу – усю суму альбо часткова. Арганізацыя сама прымае рашэнні па рэалізацыі гэтай опцыі. Зварот грошай адбываецца на картку, з якой быў здзейснены плацёж;

Па больш падрабязную кансультацыю па далучэнні рахунка арганізацыі заўсёды можна звярнуцца да агрэгатара Bepaid.

Па тэхнічных пытаннях, датычных усталёўкі модуля – у “Лічбавую майстэрню” , альбо непасрэдна ў “Фаланстэр”.

Больш падрабязна пра модуль данейта “Дойка” можна пачытаць таксама тут  і тут.

на заглаўным фотаздымку: твор М. Шагала  “Карова з парасонам”, 1946 г.

dvaretskaya

вандроўніца, журналістка, менеджарка культуры
and i want to touch another side, yep